Nyadi bisi bukit sigi ti dikumbai Bukit Entawa tu dalam Sg. Udau, pati Batang Paku, dalam Saribas. Bukit Entawa tu enda berapa bangat tinggi, lalu di pulau leboh rambau sida Iba laki Inchuk ke berumpang menoa nya menya. Kabuah mulau bukit nya laban Bukitan siko benama Unggie ke peramaan nyumpit ditemu mati dia. Lalu nampong tu lagi kitai ninga ka kabuah alai bukit nya di bali baru nama ngagai Bukit Kara Unggie. Lagi mega kitai ninga ka cherita pasal Entawa dua kayu tumboh dia ke tau alai minta panas enti hari kelalu berenggu ujan, lalu tau mega endor minta ujan enti hari kelalu lama panas.Rambau ke mulau Bukit Entawa nya menya endang udah meda Entawa dua kayu tumboh dia. Sakayu kuing ari matahari idup lalu sakayu kuing ari matahari mati. Laban ari mimpi Ingging, siko ari orang ke pun diau di menoa nya, dia orang nemu Entawa nya tau alai minta panas enggau ujan. Ingging ke bemimpi tu dudi ari Unggie ke ditemu mati ba Bukit nya.
Nyadi Unggie tu bansa Bukitan raban Entingi tuai Paku ke berumah di Bukit Saban tinggi kediri nadai nenjang, tebing kiba mudik Batang Paku. Unggie tu endang dikarap ka Entingi ka tuai nembiak iya ngikup ka munsoh ngelingi menoa sida, laban iya tu landik bendar bejalai sebelah babas, lalu rajin nitih ka ator tuai sida. Lemai siti, udah bekau sida ngikup, Unggie bejalai ngagai Entingi.
“Aku, tuai, pagila deka nyumpit ngiga lauk, lama bendar udah nadai lauk,” ko Unggie bejako enggau Entingi.“Sapa enggau nuan deh?” ko Entingi, lalu nanya ka tunga iya ke deka bejalai.“Kediri aku, deka bejalai ngulu Batang Anyut, tang enti naka dua malam kita anang ngiga aku,” ko Unggie nyaut Entingi.
“Nyadi nuan tu bejalai kediri, nya alai enti utai bisi lain asai tau ka lain gamal anang majak ka diri,” ko Entingi.
“Pia meh, enda aku majak ka diri,” ko Unggie.
Hari siti dia Unggi lalu besikap perengka, sumpit, temilah, duku enggau bekal. Udah nya iya lalu mupok. Tang leboh iya nurun tangga dia mata kiba enggi iya tak rapas enda tepeda ka laka belabong jarang, tak enda mukai-mukai lalu tekelinchir kaki iya serta lalu teraap. Sumpit ke disaan iya lalu ngelantar kabaroh serta lalu numbok babi. Laban ke bisi sangkoh dikebat ka ba ujong, babi nya tadi lalu mati. Dia deh Unggi lalu nikal ngagai Entingi. Babi ke kena tumbok sangkoh Unggie nya tadi endang babi Entingi empu.“Baka nya aku tu Entingi, babi nuan kena banchak sangkuh aku leboh aku ke teraap ba kaki tangga tadi. Kati ko baka adat ba senetang utai ti baka tu, deh?” ko Unggie.
“Nadai adat, laban ukai ati nuan deka munoh tang kategal nuan teraap. Babi nya emperu olih nuan, anang guai nurun. Tu ukai tungkal aku, tungkal nuan empu.” Ko Entingi.“Pia pen Unggal, aku enggai enda nurun saharitu, laban panjok aku di Nanga Sungai Perin lama udah enda diabas,” saut Unggie.Iya lalu bekuing nurun. Entingi lalu ngila ka iya ari pala tangga. Datai Unggie ba kaki tangga lama iya tebalenga baka baya mabok keroh, tak lama ngenong bala empelekong mabok amboh. Udah nya iya lalu bekejang majak jaoh, malik ka rumah ai mata tak nyaia semampai laboh dipeda Entingi. Belakang Unggie nadai agi dipeda, Entingi pen lalu mulai ka diri ari pala tangga nya.
Tiga malam Unggi udah nurun nyumpit, lalu nadai udah pulai. Kaempat lemai lepas nya Entingi lalu ngepuru ka samoa sida sarumah. Orang bela udah datai magang ba ruai Entingi, dia Enting lalu bejako.
“Aku ke ngempuru ka kitai sarumah tu baka nya ga, nyadi Unggie tu udah bejalai nyumpit ko iya madah ngagai aku enti lebih ari dua malam tau digiga. Tu iya nyau ka tiga, tu ka empat malam lemai tu lalu nadai ga iya, lalu apin pulai.”“Sebarang ko ator kita ke tuai,” pia ko saut orang maioh. “Kati ko penyaoh kitai ngiga deh?” ko bala sakeda.“Kitai enda tau abis ngiga iya,” ko saut Entingi. Manah kitai bebagi tiga. Dua bagi tinggal dirumah lalu sabagi ngiga, tang kitai enda tau enda mai ngepan manah laban menoa kitai tu semampai siga. Kita ke indu pagila brapi nyangkong ke bekal.
Nyau tawas hari siti bala Entingi pen lalu beradu. Entingi laban ke endang kering ati, iya pen endang tuai tajam mutus berani, perengka udah sedia mengkang nyeruran, ubat udah sikap teruba ngenggam, batu chi udah dibai kena melesit kampong dalam, nyabur udah di ukur bermata tajam, sangkoh nuju udah di intu san di genteran, lalu pisa udah mega sedi biru di anyam. Bini Entingi ke benama Dayun pen lalu pansut ka ruai ari bilik nganjong bekal ngagai Entingi ti baru deka nurun.”Kami baka nya Dayun, enti kami enda pulai dua malam nuan ngator orang nitih ka kami. Tang anang ngator orang abis ninggal ka rumah,” ko Entingi. Bala Entingi pen lalu nurun bala duapuloh iko sama ngering ati diri nadai kala ngelanjor ka pangan. “Ti mati sama mati, anak di rumah bisi ka ganti,” ko jako semaia sida kejang nurun.
Serta sida nurun ari rumah, sida lalu nyemerai Batang Paku, lalu ngulu ka Anyut nyidi bekau Unggie, ngulu ka Batang Jitu sampai apus. Bekau Unggie, seruran bisi temu sida, lalu niki Bukit Bediga antara Jitu enggau Udau. Dia iya belangkau, dijangka ka sida endor iya bemalam. Angkat ari nya sida Entingi lalu bemalam di Batang Udau. Leboh hari lalu sida lalu bejalai baru ngili ka Udau. Bekau Unggie seruran agi ditemu sida. Datai sida Entingi ba Nanga Sungai Pelandok sida ngetu merarau. Dia sida ninga ukoi seruran nekus-nekus serta besirat iko.“Ukoi aku tu,” ko Entingi, “nama baka tu enti ukai munsoh, bisi antu, nya alai kitai anang enda ngadang, anang jauh ngepan,” ko iya.
Tembu sida merarau lalu mupok niki ngagai Bukit Entawa laban dia bisi burong didinga richah makai buah kara. Leboh nyau semak dia sida bisi ensium bau buot.“Salah tu,” pia ko Entingi.Sida lalu majak bejalai begadai-gadai. Datai ba semak pun kara dia deh sida lalu meda bangkai Unggie tingkap, sangkuh bedau mengkang numbok belakang iya, lalu peresa sida meda nya sangkuh sumpit iya empu. Malik ke atas peda sida pisa iya bedau dikait ka ba puchok kara. Ruas buloh siti bedau garing-garing semak iya dia. Nya alai dijangka ka sida leboh iya nurun deka nyauk ai, sangkuh ke dienggaran ka iya ba dan kara, lalu laboh laban guyat iya ke benong nurun lalu numbok iya empu. Baka nya ko jerita pasal pemati Unggie dijangka ka sida Entingi. Nya alai bangkai Unggie enda dibai sida pulai, tang lalu ditumbak ka ba pun kara nya, lalu kategal laban Unggie ka mati dia nya alai Bukit Entawa dibali nama ngagai Bukit Kara Unggie sampai ka saharitu.
Bala Entingi mulai ka diri ngili Udau, lalu ngili Anyut terus ka nanga ba Batang Paku. Datai di rumah, Entingi lalu ngempuru ka sida sarumah baru lalu nusoi berita ngagai samoa sida sarumah.
“Nyadi Unggie tu mati. Aku endang enda ngasoh iya majak ka pejalai laban iya traap ba kaki tangga. Endang enda tau, nya mali besai, baik ka kini-kini tunga kitai endang anang majak pejalai agi. Kadua agi iya lalu ngemati ka anak babi. Nya pulai ke tungkal kitai empu. Enti traap ba kaki tangga baik ka kitai mansang ngagai rumah orang tau ka pulai, nya mali, dikumbai sangajang. Pengawa tu nadai jalai betunggu. Tang enti orang pulai ari rumah kitai datai ba kaki tangga kitai orang nya manjong tau ka ngentak ka kaki, besipak ka utai tau ka najar sabang, najar tebu, najar pisang, numbok ka sangkuh, baik ka nama utai di rusak ba kaki tangga dalam kandang menalan, tu tungkal nama iya, nganu rumah kitai. Nya baru bisi jalai dawa tunggu. Adat tunggu tungkal nitih ka pemesai utai ti di rusak,” ko Entingi nerang ka reti utai nya ngagai sida sarumah.
Iya lalu bejako baru. “Anang enda ingat ka pasal nya kita ka anak uchu dudi hari ila. Dalam kandang menalan nadai tunggu tangkal baroh ari sigi alas, manok siko enggau kering samengat siti. Ari luar menalan naka samada ari rumah nadai baroh ari sigi jabir, manok siko, kering samengat siti, tang ukai tangkal agi, nya dikumbai nyakap rumah nama penyalah nya.” Pia ko Entingi nerang ke nama jalai adat ngagai samoa sida ke begempuru ninga ka pasal pemati Unggie ke mati nyumpit ba Bukit Entawa. Nya alai nya naka cherita Bukit Entawa ke dibali baru nama ngagai Bukit Kara Unggie, nama ke lalu dikena datai ka kemaia haritu.
Original story was told by late TR Kusau of Udau Longhouse
Researched and compiled by Gregory Nyanggau Mawar.
E-mail: gnmawar@gmail.com
Ulih ku nemu sapa ke nengkebang Bup Nendak tu? bisi list nama sida kini?
Nendak tu bup majalah kitai Iban dalam taun 60-70. Majalah tu dikeluar ka opis perintah ti benama Borneo Literature Bureau, tiap bulan.
aku siku ari bala pengajar ke rindu ke jerita kitai Iban, tang tusah amat deka ngiga ensera tu laban ke nadai ditulis dalam bup baka digaga ba bup Nendak suba, aku agi bisi nyimpan bupnya suba tang nadai agi ditemu laban bala anak selalu macha lalu enda disimpan manah sayau amat, enti ulih ngaga dalam bup awak ke bisi dipeda bala sida ke rebak dudi ila
ni tusut sida ini lentie nadai tulis deh..bla apai jing enggau indai jing.
arap bsik record ensera tuai secara mp3 dikeluar ke bak website tk. Awak ke lih di download lalu didinga bila2 masa.
manah amat jerita nuan aya thomas arap ka bansa kitai iban majak nyulut ari bansa bukai
manah amai cerita peninga tuai,
haaalooo aya thomas .. ulih nuan nusui ke cherita kitak maya nemuai ngagai batang mandai?..I LOVE YUO AYA ! ^^
terima kasih
arap k cherita tuai ktai iban trus d kembuan sampai jmah ila,terima ksih nega ngagai nuan aya lbn ngmjur k cherita ktai iban.
ari aku anak iban kanowit
arap k cherita tuai ktai iban trus d kembuan sampai jmah ila,terima ksih nega ngagai nuan aya lbn ngmjur k cherita ktai iban.
terima kasih ngagai nuan aya laban terus ngemaju ke jerita jerita lama kitai iban..taja pan aku nembiak sekula,tang lebuh maya lepa dia aku enggau ati ti gaga muka lalu macha jerita iban ti ditulis ba blog tu..taja pan bup jerita iban baka novel tasah bendar digiga ke maya diatu,blog nuan tu cukup manah dikena raban nembiak ngingat lalu nemu leka jaku iban kitai kelia.ka diatu,mayuh anembiak iban kitai nyau udah moden lalu enda ingat enggau betati ke jaku enggau main asal kitai kelia..ngarap ke nuan ulih majak nambah lalu nulis jerita jerita iban kitai ngambi majak nemaju ke jerita kitai ambi bisi di peda ila..
ARI AKU,
JAMES95:
Manah amai jerita ka bisi ditu..terima kasih ngagai nuan aya..
aku selalu ga datai ba blog tu, tang jerita agi baka ka suba2..enti ulih tambah ka agi jerita ditu..terima kasih..
Hi Uncle Thomas,
lama aku udah meresa blog nuan lalubedau bisi jerita baru, aku rindu macha leka jaku jerita ti ditusoi nuan. Ngarap bisi agi peluang machan jerita baru nuan.
hii uncle thomas..aku arap ke uncle ulih ngeluar ka jerita empari tempan besi nydi bup.. enda kisah rega bup nya ratus, ribu sigi di beli.. biar loan ari bank kena mli..
bakanya mega ,aku pan amat temegah ati ninga jerita ka ditusi Thumas tegong laka ,kelebih agi jerita ensera keturun kitai iban.Enti ulih teruske meh ensera kitai iban,labanari ensera kitai tu nunjuk kitai iban bisi pengangkat enggau penatai bangsa kitai iban.Aku arab ka kitai iban meri sukong ngagai Thumas,laban ia aja ulih ngering ka bangsa kitai iban seluruh Sarawak.
terima kasih ngagai nuan uncle laban nuan ngaga ngau nyedia utai baka tok.manah bendar utai baka tok digaga ngambi ke bisi di peda ngau ditemu bala kitai ke dudi ari.taja pan ku nembiak,tang aku kecewa bendar meda bala nembiak bangsa kitai kemaya tok enggai nemu ngau ngenang ke pengawa asal bangsa kitai.nadai jaku bukai ku ditu,aku cadang ke cukup manah enti baka ensera lama iban kitai enti di rekod dalam cd.tok kebuah laban enti di banding ngau di tulis,di tusi nyamai g di gaga.baka sida ke tuai,baka inik aku mega,cukup rindu bendar ninga ensera iban baka ensera di tusi setiap pagi hari 3..ukai semua kitai tok bisi ngagai sekula ngau nemu macha,nya alai kebuah cukup manah enti iya di gaga dalam cd.mayuh sebab ya manah di gaga dalam cd tang enda alah disebut ku ditu.
ari mit nyentuk ke aku nmu nyepar kediri nti lbuh ninga TGL nusi cerita cg nda terangkat ka diri aku….nma wai fm nadai upload agai radiokitai.com….ukai semina iban di sarawak iban di johor melaka kuala lumpur selangor nggau perlis pan ulih ninga …..mesti semua cda@aku cukup gaga ati ulih mending ke pengingat tuai…ampun nti sema tekelanjur jaku…terima kasih uncle
amat munyi ko unggal nyak…aku pan agi nembiak amat…tang aku rindu amat ninga cerita empari tempan besi nyak…aku semina sempat ninga sampai vol 5…aja keujung agi lalu bdau temu aku…ukai nggai ninga tg nda ulih laban ba radiokitai.com nadai kluar…tambah gak ba semenanjung…
aku tu ndang asal orang luban ulu spaoh…ulih nuan nganag cerita pasal kami kia?
Tabi uncle GN Mawar,
Aku berasai gaga ati serta temegah ati ka nuan uncle lebuh macha semua article & serta buah penemu nuan dalam website ditu. Well done..!! Paling ngerindu ka ati tentang ensera serta adat enggau pendiau kitai Iban menya suba. Dalam sekula primary suba aku bisi ngambi pelajar jako Iban sampai tangga enam. Taja aku nembiak rebak baru diatu, tang aku amat rindu amai ninga orang nusi ensera baka ba radio waifm baka ke di tusi aya Thomas Tegong Laka. Taja aku kerja, aku enda kala tinggal ningga ensera setiap ari tiga. Minta kerjasama nuan uncle ulih nuan nulis cerita Empari ke di tusoi TGL dalam radio? Enti iya di tulis dalam bup tauka dalam ‘softcopy’ jangka aku maioh agi kami ke rebak baru deka macha serta ulih nyadi pengingat asal kitai kelia.
Terima kasih…
manah amat kaban, cerita lama nuan ngambi anak rebak baru nemu setiap raban bangsa bisi cerita ka diri.