Oh Hoi! Oh Hoi! Oh Hoi!
Sa, Dua, Tiga, Empat, Lima, Enam, Tuuuuuuujoh.
Ni kita Seragindi ke dulu ngaga ai ke bepati enda sebaka nanga?
Ni kita Seragindah ke dulu ngaga tanah ke betingkah nyadi kerapa?
Ni kita Seragindong ke dulu ngaga tanjong betuntong dua?
Ni kita Seragindie ke dulu ngaga hari ke terunji petang kelita?
Ni kita Seragindit ke dulu ngaga langit nungkat neraja?
Nyadi pagi tu kami meri bala anak kami mandi.
Kami endang nitih ka pekat, nitih ka adat.
Kami endang nitih ka adat kelia, adat menya.
Kami endang nitih ka adat aki, nitih ka adat ini kami.
Nya alai kami minta sida iya bidik, minta sida lansik.
Kami minta sida kaya, minta sida raja,
Kami minta sida iya jelai rita, tampak nama.
Kami minta sida lantang, minta sida senang.
Kami minta sida iya pandai, jauh pejalai.
Oh Ha!
Ni kita Raja Ikan, Raja Gamian?
Ni kita Raja Tapah, Raja Semah?
Ni kita Raja Adong, Raja Kulong?
Ni kita Raja Genali, Raja Lelabi?
Ni kita Raja Gumba, Raja Baya?
Kami ngasoh kita nyaga, ngasoh kita ngemata,
Kami ngasoh kita meda, ngasoh kita ngila,
Ngasoh kita ngiching, ngasoh kita merening,
Ngasoh kita nyukong, ngasoh kita nulong.
Nyangka ka dudi hari ila anak telesak,
Uchu ambu kami tu bisi bejalai, bisi nyemberai,
bisi karam, bisi tengelam.
Kami minta kita nanggong,
minta kita melepong ka sida.
Kami ngasoh kita nyagu,
minta kita ngintu sida.
Awak ka sida pulai nyamai, pulai gerai,
Pulai lantang, pulai senang,
Pulai nadai apa, nadai nama.
(Nya baru nyayat manok ari ulu orang ke nyungga ka anak mit)
Meri besai tabi agai nuan aya.. Aku tu asal ari menua ulu Belait Brunei asal bedatai ari Gudang Baram ngalih indai; campur ngau Iban Kalimantan tisi Lubok Antu ari ulu bala kanto ngalih apai, laban artikel nuan tu tau bendar nyadi ka silik nembiak sari tu.. Taja pan indai udah niang nadai ndur ka mansik pengawa lama kitai iban.. Terima kasih besai agai nuan aya nyadi ka penemu iban idup ba alam siber.. Gayu guru geri nyamai..
Tabi unggal, aku berasai andal amai ati leboh maca artikel nuan tu laban nitih ke tiris pantis kitai iban. Siti utai ka ditanya aku ngagai nuan ungal, kati baka leka piring ti kena kitai miring ke bala sedadu ke deka ngejang ke menua diri beperang tauke mantau menoa orang jauh. Ukai nama ungal laban lebuh aku engau orang PBB ke menua Lebanon suba nadai bala kami serumah di Kanowit din nemu leka biaunya, sida semina miau aku ngau biau piring aja. Minta tulong nuan ungal nyerungkau biau tu. Terima kasih.
Rindu bendar aku macha pasal pengawa kitai Iban ke nukar nama ngena adat asal kitai menya.Ba tubuh aku empu,aku bisi udah meda lalu ingat ke pengawa sida niang aki enggau ini aku di Ulu Rimbas menya nukar nama adi aku laban enda pengerai.Ia ke di kingat aku manang nya lama udah nadai.Amat ko munyi ke disebut bujangpakulawang ba comment ia meh tusun pengawa nya tadi.Tang siti utai ke nyelai,adi aku tu tadi ukai sekali,tang 3 kali betukar nama.Ia gerai nyamai,gayu guru,jadi anak ke menyana lalu idup meruan sampaike diaitu.Aku tu chukup rindu serta chemegah ati jadi anak Iban ke diau serta gawa di nengeri tang taluk serta angkun ke adat,basa,pengeraja engau penatai kitai bansa.
Gn Mawar & Bujangpakulawang,
Laban ke tak nadai penemu ba pengawa Kitai Iban nukar nama, rindu bendar macha penerang nuan bujangpakulawang. Aku lban ka diau ba negeri lalu berpengarap kristian bisi udah ngerja pengawa tu tang nadai ngena manang serta piring semina tak ngumpul semua nama aki ini ke tau di angkat ka sida anak. Udah nya ditulis dalam kertas digulung lalu asoh pantuk manok sabung.
Dia aku merati ka manok sabong nya ngais tanah tujuh kali lalu engkukuk pan tujuh kali baru mantoh nama ka dipilih. Brengjkah ari nya tadi nama anak aku dikanggau nitih nama ka dipantuk manok nya taja pan ba surat pengada iya bedau mengkang ngena nama lama.
Korrr….. samengat anak aku nya nyau gerai baka nembiak bukai udah nya.
Terima kasih bujangpakulawang,
manah amai penerang diberi nuan pasal chara kitai Iban nukar nama. Penemu tu deka dipasok ka aku dalam article aku ke dikumbai “The Early Iban Way of Life”.
Nyadi pengawa ke nganti nama anak tauka laban orang nya enda tentu pengerai. Selalu sakit me-ayu-ayu. Dia orang ngambi manang lalu belian ke iya. Nyadi ba ujung pengawa,..ba pagi manang ke nyau ka abis belian ke orang/anak mit ke ka ditukar ke nama nya ngagai nama baru. Dia manang lalu miring. Nyadi piring nya gaga tiga iti. Ba siti-siti piring nya gaga tauka beri nama ke agih ka kena nukar nama orang nya tadi. Lalu enti manuk nya mantuk siti ari piring ke udah diberi nama nya tadi. Dia nama orang nya lalu pindah nitih ke nama piring ke udah dipantuk manuk nya tadi. Nyadi pengawa nya kumbai kitai Iban kelia “Betawai”. Nyadi manuk ke udah kena betawai ke orang nya tadi lalu kumbai orang “Manuk Tawai” ke selalu kena pansa sebut lemambang dalam leka biau, sampi tauka leka pengap. Manuk nya tadi enda tau di sayat tauka disabung. Semadi mih iya mati tuai tauka mati diri. Nyadi nama orang ke udah dipetawai ke manang nya tadi lalau dikanggau ke ngena nama baru ti dipantuk manuk ba piring nya.
Orang selalu enda pengerai nyangka nama ke diangkat ke iya nya tadi enda patut diempu iya tauka kelalu bisa ba iya. Laban enda tentu ka nyadi, ba pengarap lama kelia enti kitai nya turun ulun, turun jaum orang, ngangkat ke nama orang Raja Berani. Enda nyalah-nyalah baka kitai ke ngema utai..kelalu berat dibai kitai nama nya tadi..
Minta ampun nyangka penerang aku ditu tadi bisi enda nyentuk lalau enda nyemetak. Sapa ke landik agi nadai salah ga sama-sama mantai ke penemu diri, ngambi ke bisi dipekunsi ke bala mayuh…terima kasih..
Unggal Remang,
Kengka temu aku, jalai kitai Iban nukar nama (baik ka sakit tauka ngiga nasib manah agi) iya nya ngena pengawa bemanang ke dikumbai kitai “Betawai”. Tang aku nadai kala meda tauka nemu sapa manang kemaiaharitu ke tau ngerja pengawa nya, tauka nama jalai sida ngerja pengawa nya. Kelia, enti orang nya deka nukar ensumbar diri (enggai ka sabaka enggau ensumbar mentua diri) sida iya enggau orang ngayau ngiga dengah baru. Enti udah bulih pala, nya baru sida nukar tauka ngaga ensumbar diri.
Tabi Unggal, aku minta tulong nuan mantaika jaku kenang pasal pengawa kita Iban ti nukar nama ketegal ti enda manah nasit.