Leka Jako Kena Muka Kujok Panggang

Nya alai tu tak ngenong aku punggal baka emplekong mabok amboh,
Tak ngetu baka puyu mabok keroh.
Kebuah pia, laban aku tak meda lubok ke betelok mua penalam-nalam, meda ulak tak besintak dalam beriam, ninga guntor ke semepur inggar demeram.
Bisi orang ngumbai nya bakat, bisi ga nyangka nya lelangan.
Bisi ngumbai nya ribut, bisi ga nelah ka nya ujan.
Tang dipeda aku ari aku ti dudok tu, tak pugu indu selatan nya ke lama udah bemunyi deram-deram naban ka rauh.Aku bisi lengan tang pandak jari, enda ulih enggau kita bepegai di puli tali merundai.
Bisi betis tang pandak kaki, enda berani dibai pangan beuji-uji niti tali lalau nyemerai.
Nya alai tak baka ke merau meh kami tu, tak nebing-nebing, indah enda baka orang ke bejalai, tak ngembing-ngembing.
Tang taja pia aku arap ka pangan enda nyeging, enggai ka aku tak terinding di puting batu bebingkai.

Tang kati ko enggau deh, nunda ko pantun jako tuai; enda ulih dikerari ka panas pagi, dudok bediri pan bedau ga beseri angat bedaang; enda ulih dikenggai ka panas lemai, betanggui bebaju pan bedau ga geremai mandang belakang.
Nya alai ke tu, nadai ko enda mupok meh aku tu bejako saleka-dua, nunda ka peransang jako tuai; dia alai karam, dia ga alai betimba; dia alai mati, dia ga alai bebaiya. Enti munsoh munoh, ringka ga alai pulai, enti antu nemu sebayan ga ngambi bangkai.

Nya alai kami ke nandai mansang nindong, ngagai kita ke berantu sida ke lalu dulu pumpong,
Rindu bendar meda utai ke udah diengkah ka kita mua pemanah-manah atas kelasah tikai bebuah ngambi langkah jelu remaung,
Bungkur kita enggau selangor bali belumpong,
Denjang kita enggau gagang bunga belitong,
Tak rendang-rendang mandang peretang penyarang rumah jebong,
Tak begamal renjong-renjong ngabih legit bukit Santubong.
Ukai kitai enda ninga berita legit Bukit Santubong,
Kaki pasir meki alun gigi gumbang besabong,
Punchak iya menya alai Tuan Rajah ngaga banglow,
Alai iya bagas besila dudok nyerungkong,
Nerupong bandung orang ke deka nuntong datai nyerang.
Ngimbai tanah landai nya diatu dikumbai orang Pantai Damai,
Alai temuai nuntong datai ngabang gawai ading pelancong,
Alai tokay besai dudok bedamai bulih untong.
Tang bala ke tu tak nadai penatai baka tudah pangan tu tak semina bemata genong-genong ngemata ka orang ngisi tabong mata wang.

Nya alai kami ke nandai mansang ninda,
Ngagai kita ke berantu orang ke lalu dulu lela,
Ngaga gadai ka sida ke tuai lama nadai ilang linda,
Tak mua pengaga meda pemanah basa digaga kita ngagai kami ke berintai dudok betunga,
Meda pemanah utai diengkah kita dikelasah tikai bebuah Haji Kelaya,
Dibungkur kita enggau langgor pua mata,
Dikajang kita enggau gagang bunga beta,
Udah ditimang aya jang enggau raang dabong rasa,
Udah dikelulu ka anak Bujang Lemambang Tepong Bulu enggau jako mua pengena-ngena,
Tak nyau terang rendang-rendang mandang peretang rumah lada enggi kita,
Nya alai tak enda salah-salah asai ke nengkadah menyaung tuchong Bukit Ensanga,
Tumboh tekam ke meruan dua bepanga.
Tang diatu nadai agi, udah ditebang niang Patinggi Datu Nuga,
Orang ke berani ati enda jena-jena,
Baan iya ka langkan berangai panjai lima,
Kena iya belanda ngeransi mari nyida berimba bena pangka pasang.
Ari baroh nya udah diperimba bansa Dayak ka temuda,
Tang bisi ga berita madah ka nya udah diambi orang ke pemisi nyadi lumbong mas chala’,.
Nya alai enti sangka sida ke anembiak nya kena,
Bansa asal ke bempu temuda nadai meh nya temu penunga jemah ila,
Semina tak bengap-bengap ngapa,
Kelimpah ke ari richah rami ketawa,
Bengkak tapa puas ditempik bai orang selamat gawai mata’ bebuka ka rasa pintu kilang.
Nya alai kami ke nandai mansang bebala ari Batang Kerangan Pinggai Rinda,
Ngagai kita diteku Batang Samu bila dua,
Berantu ka sida ke lalu dulu nyaia,
Sida ke udah dibagi Sempeti ketak Petara.
Tak mua pengaga meda atur tabi serta adat basa kita,
Ngagai kami ke bebandi dudok bebanda,
Meda pemanah utai diengkah kita dikelasah tikai bebuah ngambi langkah jelu singa,
Udah dibungkor kita enggau langgor bali mensuga,
Udah dikajang kita enggau gagang bunga chempaka,
Udah dikelulu ka anak Lemambang Tepong Bulu enggau jako nyampau didinga,
Udah ditimang aya jang enggau raang dabong saleka,
Udah diramban aya akan enggau genteran leka kana,
Tak nyau terang rendang-rendang mandang peretang rumah raya enggi kita tu,
Ke nyau nyegang penoh pengabang kitai bansa.
Tak enda salah-salah ngabih legit Bukit Lingga,
Legit-legit belit Bukit Lulong Kerapa,
Tuchong iya Gunong Lesong wan Lulong seduai Kumang Dara Inja,
Ari baroh nya tumboh batang kara raka jurai dan lebat bungai,
Tang diatu nadai agi.
Ko orang, udah dijarau Ijau Lang Menaul Banda,
Udah bekau iya ke tindok nampok lina,
Nya ti ngasoh iya tampak rita, jelai nama ke sedura tau serang.
Ari baroh nya kampong jerong Lulong Kerapa,
Pulau galau Balau Lingga,
Madang keladan tekam bunga,
Tang diatu dini nya agi bisi,
Nyau ransi beli Company bejuta-juta gaga’ ke lumbong batu berega,
Nya alai ke diatu mensia ke mangkang kaki Bukit Lingga,
Nyau kapa-kapa, kawa-kawa abis cherita nadai agi chara ngambi perengka ramu melintang.

Nya alai diatu aku nyau pulai ngagai pengawa ke diasoh kita bejako,
Kerja ke diasoh kita tembu ka.
Gendang kita nyau udah mansang, nyamai alai kami nyingkang ngasor ka rayah.
Pencha kita udah dipeda, nyamai alai kami nginda mun ka sembah.
Puchau kita amat nadai pengabau, nya alai nadai ga bekau abi semilah.

Nya alai utai ke dibungkor kita enggau selanggor bali menyeti,
Dibungkus kita enggau saratus pua lebor api,
Udah dikajang kita enggau gagang bunga melati,
Udah dikelulu ka anak Bujang Tepong Bulu enggau jako nyampau munyi,
Udah ditimang aya jang enggau raang dabong gigi,
Nya kena kita ngayan ka pemanah basa kita ngagai kami sabala ke bebanda dudok bebandi,
Kena kita ngayan ka basa tabi kita ngagai kami ke datai ari ili nurut ka reni pasang pagi.
Nya alai nyangka tak enda ulih sagam aku enggau pasingan kanan ujong jari,
Nyangka tak enda ulih ramban aku enggau genteran jako puji,
Nyangka tak enda ulih sebut aku enggau tangkup rakup dabong gidi,
Nyangka tak enda ulih sangka aku nitih ka pinta kita nembu ka ati kita ke pun pengerami.

Nya alai utai ke dia nyangka tau dikumbai aku raban kajakang Manang Sempadi,
Tang bisi ga orang ngumbai nya bala bini Selamuda, Dayang Manis Muka, indai Begeri,
Nya orang bisa di nyawa sidi di jari,
Betul di tungkol luak ati,
Tau dikena kitai nenong burong pengabas mimpi,
Diengkah kita ba tengah pinggai bekaki belapis ka seri daun sabang.

Sida bukai nya bala Ulop Batu Belah,
Bujang Lang Lengain Rarah,
Nya ga tukang gerah jampat bepadah ngambi ngabang.
Nambah ka nya tepong gulong padi paya,
Penemu baru kitai Dayak,
Kena ngelai pengawa ke bepanga saribu pampang.
Raban bukai nya jangka aku bala sida Janggai,
Ai sempurai padi mudah,
Gaga company, beli kitai, chukai perintah.
Semua utai nya raban panggang petugang manok pagah,
Dikena kitai rami richah nanga ka raang.

Nya alai aku ke muka tu bakanya mega,
Ukai aku muka sengapa pia,
Ukai ketegal jayak aku bangat jegak,
Baka ka kelalu deka peda kita.
Tang tu diachok aku enggau keruntok tandok rusa ubi,
Dikeris aku enggau keris besi kerasani,
Lalu disua aku enggau tapa ujong jari.
Tang taju tu mit enda nunda ka ati,
Aku arap ka kita ulih nerima iya enggau taga pinggai bekaki,
Tau diengkah ka kita ba mua benda guchi,
Beri kita ading piring sungki,
Tunu ka kita resu garu angi,
Tangas kita enggau kerepas menyan melati,
Udah nya biau kita enggau selanjau manok laki,
Kelulu ka kita enggau jako buah mimpi, tuah tambah jereki.
Nya ga sumpah sida ke lama rebah ilang lesi,
Sida Luta Tedong Pasiri,
Sida Puyu uchu Munji enggau Liban Buban aki Utee ke diintu kitai saharitu.
Nya alai utai nya ila ditaroh kita tegoh-tegoh,
Tau ka pengaroh Batu Peti,
Awak ka bisi dikena kita pagila lusa dudi hari,
Awak ka kita seruran betali diau di negeri serta menang dalam samua bidang pengawa dagang.

Nya alai awak ka semina tu meh jako tu punggal,
Tu utai kena aku muka …………… Lalu sua ka duit pemeri.
Compiled by : Gregory Nyanggau Mawar
Original Source: Late Lionel Frederick Mawar,
Kerangan Pinggai, Paku,95600 Spaoh, Saribas.
E-mail: gregory.mawar@shell.com