Leka Denjang Lemambang Nenjang Sengalang Burong

Lapa mata hari kitai pagi tu,
Tak nyau pegari mandang tiang?
Lapa mata panas kitai pagi tu,
Nyau mandang idas pakan melintang?Uji nginsit mimit nuan wai rrit baku tantai,
Uji nyeliah nuan wai selabah pinang tuai,
Enggai ka nadai jalai kami,
Anak Bujang Lemambang Tupai tu,
Minchang batang temiang kirai.

Lama randa aku udah tepeda ka kita aya,
Ke dudok linga-linga,
Baka kara ke tumboh dili dia,
Kena pangka ka bua angin ngesai.
Lama medong aku tu aya,
Udah meda kita ke dudok bebandong,
Baka puchok tapang betenong,
Kena kabong burong angkat terebai.

Tang deh anak Bujang Lemambang Ensilup,
Tu tak ba-ati nangi berasai takut,
Sasingkang surut sasingkang bejalai.
Tang semadi aku nembu ka pengawa nempus ka gawai.
Meda bulu pala kita tak nyeregu,
Baka bulu laja dikirai,
Meda tapa kiba enggi nuan aya,
Tak bercherengga darah rangkai.
Tak nyau meda kukut baut enggi nuan,
Ke bauh berengut makai utai.
Tang deh lambu aku tu,
Enda tau ngelulu ka nuan,
Ngena jako nyampau dirintai.
Nya alai enti main aku bisi salah anang nuan mantah,
Enggau dilah dabong landai.
Anang nuan ngemalu tudah aku di lempedu tangkai kamai.

Nyadi ari sapiak nuan tu aya,
Didenjang Aki Lang Menaul Nyakai,
Ari sapiak didenjang Ketupong seduai Beragai.
Enti baka kitai tu begawai umai,
Nyeridi ka sempuli padi nubai,
Enti kitai ngambi Bujang Rangkang Kirai,
Nemu ga aku ngelengka ka ba nuan,
Tandok rusa ke beperiga bepampang tigai,
Enggau taring utieng babi ngalempai,
Enggau batu gelinggang gumbang begagai.
Nemu ga aku nyua ngagai nuan,
Batu reba kena wa ka bena pasang lemai.
Laban nuan aya endang ditemu antu bunsu Selampandai.
Laban jari nuan ke endang sidi,
Nanam simpuli padi nubai,
Isi nuan sekali tibang besai,
Pitak ka nuan padi pulut lemak,
Ke beserak tuntun kerigai,
Nya ke ngasoh rita nuan sadura jauh jelai.

Tang naka nya aku ngelulu ka nuan,
Ngena jako ke betiu maioh berambai.
Laban kitai tu begawai besai,
Mela leka begumba balang begundai,
Ngambi Aki Lang Menaul Nyakai.

Nya alai lengan kanan enggi nuan,
Tak ngenggam genteran sangkoh gansai,
Jari kiba enggi nuan aya,
Teleba ngereda orang ke lela dulu parai.
Nya ke ngasoh diu nuan aya ditemu antu,
Ke saribu maioh datai.
Laban nuan endang dikemata ka Petara.

Laban nuan ke digelar orang selanjau ijau manok tawai,
Nya alai kaki nuan aya diungki orang,
Enggau ragi benang cherai.
Sayap enggi nuan ditanchang,
Ka orang jimat ubat besai.
Nya baru nuan dikandang Kumang seduai Jawai,
Dikurong Tutong seduai Ngelai.
Pala nuan ditata sida,
Ngena lala nyiur tuai.
Udah nya baru nuan,
Ditepan ka seduai di genturan papan lekai,
Iya ke begelanggang ka lampang besi bilai,
Ke malai rurun rampang bungai.
Nya baru seduai iya ngujok nuan aya,
Ngena pelepok bali belulai.
Udah nya baru seduai,
Melam nuan tiga malam.
Nyau chukup tiga lemai,
Nya baru orang nandang ka nuan,
Ka Batang Pahang tebing saberai.
Lalu ditepan ka orang nuan aya,
Ba baritan bangkong panjai,
Ke alai nuan bediri nyandang perapang pedang panjai.
Datai nuan din nya baru nuan betachah bulih mudah,
Ke bedengah rawai tigai.
Siko tangkap diberap nuan bai pulai,
Ke ditepan ka nuan diluan indu berangai.
Datai nuan di seregah rumah panjai,
Nya baru nuan di gaga ka orang gelar,
Ke bensumbar Ngingit Lemai,
Ke terbai mangum bukang.
Apin ga nuan digelar sida ngagai Pangka Selulut Ribut Ngesai,
Napat ka landai dan lintang,
Enggau anak Lamba Tapang Bekumbai,
Ke tumboh di seradak ulu sungai,
Siang berserekang malam begulai,
Jadi ka jalai Aki Lang Menaul Nyakai,
Nepat tetai bintang beguang.

Collected by Gregory Nyanggau Mawar
Kerangan Pinggai, Paku, Spaoh, Saribas.
E-mail: gregory.mawar@shell.com