Sa, Dua, Tiga, Empat, Lima, Enam, Tu………joh.
Nya alai aku ke bediri degi-degi, chegit-chegit,
Nyingkang ka kaki, nginsit ka tumbit,
Mansa mua kita ke semuka dudok bekempit,
Nengah kelasah tikai lampit.
Ukai aku mai ati jai ringat mimit,
Tang aku mai ati gaga rindu gagit.
Aku ga miau kita enggau selanjau manok kunchit,
Diasoh orang ke bempu pengawa melah selabah pinang sa-seit.
Nya alai aku miau iyang semang ari belakang mulai ka tumbit,
Ngambi ka iyang gangam kita enda mai ati tajam baka balas mata binit,
Iyang tinggi kita enda mai ati jai ngeransi ngenyit.
Nya alai aku meda kita endang orang tugu tunggul bait,
Enti maia bumai enda kala lama ngisi engkabai tibang sangepit.
Jari sapiak kita teleba matak setawak bulih duit.
Enti maia berumah kita aya endang teleba niri ka kah lamba bait,
Ruai kita endang seruan kerembai tikai anyam lampit.
Enti malam enda kala padam dian lampu pichit.
Nya alai tu aya ukai biau ngapa, biau pia,
Tu ga nunda biau Apai Sabit Bekait, Selong Lanchong Bebelit,
Alor Bujang Beruang Langit,
Kumbai kita Sapit Raja Petara.
Nya alai aku ka bediri giai-giai,
Nyingkang ka bulang kaki bejalai,
Mansa kita ka semuka dudok berintai,
Baka ke begah-begah nujah kelasah anchau tikai,
Ukai aku mai ati jai, ati kudi mari rimai,
Tang aku mai ati gaga di dada tangkai kamai,
Diasoh orang ke bempu pengawa pun gawai,
Miau kita enggau selanjau ijau tuntong engkerawai.
Nya alai nasit tu manah mimit,
Tisik melit tiga berintai,
Iko kelabu merundu lebat merundai,
Sayap beiap-iap nempap selingap arong kerigai,
Kukok rauk-rauk inggar berangangai,
Didinga ari langit landai baka bingkai tibang terantang.
Nya alai tu kena aku miau ka iyang sumang,
Ari belakang mulai ka gundai,
Ngambi ka iyang gangam kita enda mai ati tajam baka balan besi bilai,
Iyang tinggi kita enda mai ati kudi ngeransi besai.
Meda kita ke tajam gerumun mata gansai,
Tinggi di suli labong jebai-jebai.
Enti maia berumah kita endang teleba niri ka kah tebelian tuai,
Panggau kita enda kala pungkang anchau tikai,
Enti malam enda kala padam dian lampu kedai,
Enti maia mangun ka pun padi nubai,
Enda berasai ngebu ka engkabai tibang terentang.
Jari sepiak kita endang teleba matak setawak raban bendai,
Jari chawit kita teleba nyepit duit ringgit bebungai-bungai,
Jari kiba kita teleba nyepit pala agong tuai,
Punggong kita teleba nangong kelutong bedil besai,
Pala kita bisi repa umba lelanjai bulu ruai,
Jari dua enggi kita bisi ga udah bulih leka nyiur muna ke bemata dua berimbai.
Nya alai tu ukai biau ngapa biau pia,
Tu ga nunda biau bunsu Selampandai penempa kitai,
Ke dikumbai kita Sempandai Manang.
Aku ke bediri degi-degi jendam-jendam,
Nyingkang ka bulang kaki kanan,
Mansa moa kita ke semuka dudok betipan,
Baka ka begah-begah nengah kelasah tikai rutan,
Ukai aku mai ati jai, ati kudi balat kelabawan.
Tang aku mai ati gaga rindu ka pangan.
Laban aku diasoh orang ke bempu pengawa pun kerja,
Melah selabah pinang kejakan,
Miau kita enggau selanjau ijau manok jelayan.
Nasit kita manah mimit, tisik nyelit kaki kanan,
Bulu tu keno ko antu, jelayan ensariban.
Tu ga manok intu tuai ke lama udah nadai dulu danjan,
Iko tu merundu lebat mensebam,
Sayap beiap-iap nempap selingap dada kanan,
Kukok rauk-rauk ngebus ka rayok miga redam,
Didinga Ini Andan orang ke ngembuan ubat jadian,
Ngambi ka kitai tebekan mali langkang.
Aku ke bediri degi-degi, dunga-dunga,
Mansa moa kita maioh ke agi mit telesit baka bla,
Nengah kelasah tikai bemban puda.
Ukai aku mai ati jai, ati kudi balat nyida,
Tang aku mai ati gaga rindu ketawa,
Miau kita enggau selajau manok lia,
Ari asoh orang ke empu gawai pun pengawa,
Nya alai aku miau iyang sumang kita,
Ari belakang ngujong ka pala.
Nya alai nasit tu manah mimit, tisik melit ari kiba,
Iku merundu nyau kua-kua,
Bulu selabubu benong ngelaja,
Sayap beiap-iap nempap selingap kerigai kiba,
Kukok rauk-rauk nyangkut enggal lima,
Didinga Buga ari tisi langit lada nebong ngeruang.
Aku meda kita ke tajam baka bulan mata tangga,
Jam kita tak seruran lekat di lengan jari kiba,
Neck tie kita kitai-kitai, kunda-kunda,
Fountain pen kita seruran bemain berimbai lima,
Buok pisin kita endang nyengala lichin unsut brylcream minyak pala.
Enda mai ati jai ngeransi nyida,
Meda kita ke agi mit lelachit baka bla,
Meda kita ke agi biak apin bisi batang pengawa,
Nyangka kedudi hari jemah ila,
Pandai di chunggai jari kiba,
Tajam di dalam kerubong pala,
Belajar tinggi tangga, bejako enda saga,
Dudi hari jemah ila, kita tau jadi tuai bansa kitai,
Nyadi kepala kitai bansa Dayak,
Ngambi ka mansang ngelui ari enggi orang.
ABIS…
Collected by Gregory Nyanggau Mawar,
Kerangan Pinggai, Paku, Spaoh, Saribas.
E-mail: gregory.mawar@shell.com
mnh amt…munyi main tok…mnh mat penemu kta…mntai k leka main tok dlm internet bka tok…ngmbi main asal ktai iban endk pupus…di telan zaman k moden bka k diatok..q nyukung kta…
hai,uncle…nuan bisi nyimpan pantun bulan 5 enggau 6 kah??nti bisi ulih email agai ku,bigneth_96@yahoo.com….
manah amat ruai nn tu ngal….
manah amat bisi utai baka tu meri pengingat ka kami rebak baru diatu ka maioh ia ka enda nemu utai baka tu
kati nti biau nyak nibuh ngena manuk tau gak aya?rindu mai ku meda leka biau nyak.so unique..so i’m decided to use the leka biau to welcoming the guest on my wedding day..ku tok start rindu ninga leka biau maya ku ninga Mr Elison Ludan berbiau maya pengerami ngiling tikai..
anak dara sengalang burung,
Bebiau mesti ngena manok lelaki kena muai “bad luck”, mimpi jai tauka burong jai. Nya baru “guest” enggau “host” senang ati berami melah pinang.
tabi ngagai nuan aya,
nyadi aku tok deka nanya, biau melah pinang tok tau di sebut pia aja kena nyadi pemuka event ka melah pinang?or kitai msti gak ngena semua utai ke kena bebiau?
anak dara sengalang burung,
Leka biau tu dikena miau bala pengabang ti datai ngagai pengawa melah pinang. Udah bala pengabang dudok magang, nya baru orang miau pengabang enggau manok – nadai ngena piring tauka utai bukai. Tu semina kena meri basa enggau “welcome” bala pengabang.
aya aku rindu amat macha utai ti ditulis nuan tu. aku tu asal ari ulu krian. kenu ku sida apai kitai ai kerian anggau paku endang baka buah kitai setangkai laban aki ini kitai menya ukai orang bukai. tang diatu leka main kitai bansa majak lenyau laban orang ke tuai mayuh nadai agi. orang ke nembiak mayuh endar nadai pengerindu ke leka main kitai bansa peda aku. ukai ga semua. nya alai manah amat pengawa aya ke ngaga blog baka tu lalu mantai ke leka main kitai bansa ngambi ke bisi dibacha bala mayuh. nya alai aya sekali agi aku meri besai terima kasih ngagai nuan aya. lalu aku ngarap ke nuan aya ulih ngajar nembiak kitai bansa leka main kitai iban meh.
Ujang,
Terima kasih laban bisi nemuai ngagai ruai aku ditu. Endang patut bansa kitai Iban agi ngembuan serta belajar ka main asal kitai. Nya kabuah aku mantai ka naka utai ulih digumpul aku awak ka tau dikunsi ka enggau anembiak rebak baru. Arap ka kita majak belajar ka leka main asal kitai.
Bujang Tabuan,
Bup tu agi di compile.
Arap ke utai ditulis dalm blog tu ulih di salin ngagai bup awakka mayuh agi kitai bansa ulih macha enggau belajar ka penemu tu. Terima kasih.
enda puas meratika pemanah tusun leka jakuka bisi di tulis nuan unggal.
Aya, aku rindu amai ke leka jako kitai Iban tok lebih agi maya ngintu pengawa melah pinang tok. Aku mega ngarap ulih ngintu pengawa tok enggau penuh adat bansa kitai. Bisi sekali aku sempat eggau kaban ngintu pengawa tok di rumah panjai kami di lubok antu, maya nya aki aku bepantun eggau leka nyawa ia ti manah amai di dinga. Tusun jako tak nadai salah siti. Enda berasai ai mata aku laboh ninga ke sada ia. Nadai utai ti manah ari nya. Udah nya ia lalu ngeremai ke kajat ia tak baka ke baru angkat bujang ko aki aku. Maya ia bepencak, kaki ia asai ke terebai ko ia. Nemu nuan aya, aki aku nya endang enda entu ulih bejalai, tang malam nya ia baka ke nadai pedih kaki. Nyau betungga ke tajau aku ngirup ka meda aki aku ngajat. Nyau bendar aku ngasak ia ka ninga leka nyawa ia. Puas meh ati aku aya tang taun 2009 nyin ila, aku ga ngintu pengawa melah pinang tok aya. Ngarap aku bisi agi peluang meda main asal kitai eggau mayoh agi. Datai ila aya enti aku madah auk. Eti nadai apa nama mujur meh pangawa aku pia ia.