LEKA MAIN

This page demonstrates the rich Iban oratory and literary tradition used in festival, rites and rituals performed by the Ibans in Sarawak, Malaysia. This post covers sampi (prayer), biau (cast off evil spirit or wishing well being), denjang (blessing), timang (praise) and jako berambai (poetic words) used.

“Mensia enda tau idup ba roti aja….” Nabi Isa.

Bechuan ka jako Nabi Isa nya kelia, tuju bendar aku ngeluar ka leka main kitai Iban ba weblog aku ditu, awak ka bisi diperati ka semua pemacha ti rindu ka macham-macham leka main kitai Iban. Aku arap ka sida ulih belajar ka pemaioh macham enggau penalam reti leka jako kitai Iban. Ari tu tadi anembiak kitai Iban nemu rindu, angkun (loyal) serta tamegah ati (proud) ngemesaika pesaka bansa kitai ba sanentang pengelandik kitai Iban ngena jako diri empu. Jarang bendar bansa bukai dalam dunya tu bisi maioh macham leka main ari enggi bansa kitai Iban, lalu jarang mega reti jako enggi sida sama penalam reti enggau jako kitai. Pesaka kitai ke bansa tu tau lenyau lela ngapa jemah ila laban kitai Iban kelalu angkun ka main bukai ti bisi dalam dunya moden diatu.

Kitai mensia ukai semina ngulih ka reta tengkira enggau pemakai aja kena kita idup lantang senang, tang kitai mega mesti mansang ka pesaka ti dibai kitai turun-menurun dalam pala kitai empu baka penemu main asal enggau penatai diri empu. Ari nya kitai nemu angkun ka bansa diri sereta ingat ka semua pesaka ti udah ditinggal ka aki-ini kitai kelia ngagai bansa diri empu. Kitai mega enda tau enda nemu ninggal ka pesaka lama ka peturun kitai Iban jemah ila enggai ka pesaka bansa kitai lenyau ngapa di dunya injau tu. Kitai mensia endang lebih nyelai agi reti jalai pengidup lalu pendiau kitai endang sigi maioh rambai pengawa ari semoa utai bukai ti idup di dunya tu. Nya kabuah kitai mensia digaga petara lebih bekuasa ari semua utai bukai ke idup dalam dunya tu.

Dalam jalai pengarap, nadai mensia tau ngumbai jalai pendiau bansa siko-siko nya betul tauka salah laban atur pendiau kitai mensia, ka lebih agi jalai pendiau kitai Iban, endang udah diator petara magang. Sida Petara kitai endang selalu dikenang kitai dalam leka main bisi ngabas serta ngator arus tuju pendiau kitai kenyau ari kelia menya. Sida mega selalu dikelulu ka lemambang kitai bisi nurun ngabas sera, ngabas kangau anak mensia ke bisi ngerja macham-macham pengawa begawai. Nya kabuah pengawa gawai kitai Iban ukai dikerja semina dikena berami aja, tang iya ke batang agi, dikena kitai meri terima kasih ngagai Petara (thanksgiving), dikena kitai meri basa (respect) ngagai Petara, dikena kitai minta tulong ari Petara, enggau maioh kabuah ke bukai. Penyamai enggau pemedis siko-siko kitai mensia endang sigi asam garam pengidup kitai sahari-hari. Aku arap ka anembiak kitai Iban tekun sereta kering ati nempoh penguji dalam pengidup enggau pendiau sida awak ka bulih pengidup ti meruan serta lantang. Aku mega arap ka anembiak kitai Iban ke diatu sama-sama belajar sereta ngemansang ka macham-macham leka main asal kitai laban orang ke tuai ke landik ba penemu nya nyau makin nadai agi.

Ai Ansah Orang Ke Dulu Bejako – Mungkal Menalan:

Tu jalai jako dikena ngangkat tauka meransang orang ke dulu bejako enti bisi utai deka dipansut ka ngagai orang maioh enti bisi pengerami tauka begawai.

Tu ai seribat pakau kawat,
Tumboh chap jako tuan,
Tu ga udah dikandang orang di gudang Pulau Pinang,
Bekunsi dagang enggau China Pulau Labuan,
Nya alai puchong tu udah bisi sain Agong tanda tangan,
Ari sapiak tu butol arak udah dichap perintah Sarawak,
Di kemendar ka masok pak pasar Padungan,
Udah nadai bantah ari perintah,
Disagi bala Menteri di Dewan,
Lalu dipedua ngagai Dayak bansa Iban.

Nya alai ka lemai tu tak merabensang ari balang butol besuran,
Tak merenchit ngagai chubit gelas ayam,
Ke lalu disua ka aku ngagai kita diberi ngagai nuan,
Laban aku meda belakang nuan tinggang seludang baju anyam,
Laban lengan kiba enggi nuan,
Bisi ditanchang tumpa tali jam,
Laban kening enggi nuan tak perenching mandang pisan,
Nya alai nuan aya ka lemai tu,
Digela aku manah bulu kelabu empitu,
Pegai tumu mungas menalan,
Mungkal midan muka kelang.

Nan Ka Kuta:

Nyadi jako ‘Kuta’ ditu nya ukai kuta ti dikena bejaga ari munsoh baka leboh menoa kitai agi siga kelia menya. Pengawa tu dikena leboh maia gawai nikah. Kuta tu digaga ba rumah indu ka ditikah ba sanentang pala tangga alai pengabang niki enggau ba tengah rumah. Kuta tu digaga ari pua kumbu ti endang dipilih serta manah gamal lalu digantong awak ka kena surok tauka pansa bala Pengabang ti niki. Pua kumbu tu tadi dikelulu ka nyadi kota lalu ditan ka orang ke endang dipadu ka sida sarumah nya bejako. Orang ke diasoh nan ka kuta nya endang orang ke landik ba leka main, bapenemu ba ator pendiau Iban sereta mega landik berambai ka jako. Kuta tu mesti dibuka ari kaban lelaki ke deka niki ngena rurun rambai jako orang ke endang disabong sida bejako.

Nyadi jalai jako kena nan ka kuta ba pala tangga tu diambi ari Naing Jamit anak Unya, Ulu Krian, Saratok. Iya tu endang bapenemu ba pasal ator pengawa sereta landik bendar pasal jalai leka main kitai Iban. Iye endang selalu di-injau orang bejako leboh maia bisi pengawa ba Rumah Panjai sabelah Ulu Krian enggau bala kaban belayan iya di Paku, Saribas.

Anang guai nyingkang kita aya enggau bulang kaki bejalai,
Uji tentang kita anak gantong tengkebang ampang belulai,
Ke bebuah manah amai ngambi perambai manok menang.

Tu ukai pua ngapa,
Tu ga pua ditenun niang Jara Indai Runai,
Peda nuan tisi pua labor api tu,
Digaga iya gambar antu gerasi,
Ke bediri dua berimbai.
Enti nyerumba Linda lemai hari,
Tu ke benyawa chai-chai,
Muru antu penyakit padi,
Ngasoh sida serta rari ka tisi punjong serarai.
Enti agi kelia menya,
Pua tu dikena sida nyerayong pandong,
Leka begumba balang begundai,
Ke begamal lempai-lempai,
Ujak tangkai jila isang.

Uji tentang kita enggau bulang mata kiba,
Redai punggai gantong pua,
Enggi kami di Kurong perabong Rumah lada,
Ke bebuah mua pemanah balat merera,
Ke senika nadai lapang.
Tu ga tengkebang ini kami,
Ke udah rimpi dulu lela,
Ke benama Dimah Indai Limpa,
Nya ga indu ke pandai di chunggai tinjok kiba,
Landik gawa tukang nengkebang,
Indu pantun tambun puji sida melanyi bujang biak.
Enti agi kelia menya,
Pua tu dikena sida nyerayong pandong sempuli padi paya,
Didenjang sida anak Bujang Lemambang kera,
Ngambi ka enda menawa nadai nawang.
Tang ka saharitu diredai kami di penyurai pala tangga,
Laban kami bisi nentang enggau bulang mata kiba,
Meda kita tak betubuh maioh enda jena-jena,
Tak begaya mua pengumba.
Patut kita tu digela aku baka jeliu betutu ikan banta,
Ngaban di pala Kerangan nunggang.
Nya alai dijangka aku aya,
Bisi bala kita juring di putting jari kiba,
Lansik dijelik mata meda,
Nemu nyangka ai lia bemain di pala dulang tapang.

Uji tentang nuan aya eggau bulang mata ngenong,
Redai punggai ampang belumpong,
Bebuah mua manah bisi digaga gambar Lintah,
Belabong dilah melit rekong,
Puchok digaga gambar mayau tandok,
Beukir degok bepanau rusok bepulas uchong,
Ari kaki gaga ka gambar antu gerasi ke bediri genong-genong.
Tu ga ukai pua ngapa,
Tu ga ditenun ini kami ke udah rimpi dulu lindong,
Ditenun bini Linggir benama Anong,
Nya indu ke pandai di chunggai tunjok ujong,
Di-inang Kumang ditulong Lulong,
Indu orang di Gelong Batu Nakong,
Nyingit Nyinggong Simbang Nerabang.
Enti agi kelia menya,
Pua tu dikena sida iya,
Nyerayong leka begumba balang bedabong,
Enggau nyerayong gempanang tekang mau raong,
Begamal lepong-lepong mesai lampong panggal batang.
Tang kediatu diredai kami di penyurai Kurong perabong,
Meda bala kita tak sereta datai nuntong,
Kita ke digela aku jeliu betutu ikan adong,
Ke ngentong ditikong kaki empang.
Nya alai jangka aku bala kita enda patut enda meda,
Enggau penchula mata ngenong,
Nuju arong nanga Rajang.

Uji tentang kita enggau bulang leka mata,
Redai punggai ampang mensuga,
Buah iya mua pemanah manchor mirah mansau jera,
Bungai udu pisit saleka nadai lapang.
Nya alai tisi pua labor api,
Digaga ka orang gambar bulak buli,
Betapa bisi jari mengeli bisi gigi,
Ke bepala bisi daai.
Enti nyerumba Linda lemai hari,
Iya tau benyawa chai-chai,
Ngibun kunchi puchok kuta,
Tu ukai pua tenun sengapa,
Tu ga ditenun ini kami ke udah rimpi dulu laya,
Ditenun Sawai seduai Lada,
Ulih seduai iya ngembun betata di sebum Ambun laboh nyaya,
Betenggau ka pernama bulan mansang.
Nya ga indu ke pandai di chunggai tunjok dua,
Lansik dijilik leka mata,
Laban midong seduai iya ditulong Lulong seduai Kumang Dara Inya,
Indu datai ari Nanga Temaga Gelang.
Enti agi kelia menya iya,
Pua tu dikena sida nyerayong pandong anak pegeri tajau menaga,
Ke remba-remba dudok di chala alang gerunggang,
Dikena medong ngurong kandong leka gemala,
Ke cherira tampak terang.
Tang ka saharitu dikena kami ngurong perabong Rumah raya,
Laban gasan kami tapeda ka kita betuboh mua pemaioh mai bala,
Ke sereta betambak singkang.
Kita tu meh ka disema ka kami baka jeliu betutu ikan juara,
Nangkap di bunga lambok pasang,
Laban aku nyangka kita endang lansik di urik leka mata,
Lansik ngelala orang nanga muara Limbang.

Nya alai tu meh ka dikumbai kami wong,
Ke beranggong dua besendi,
Enti malam iya benyawa guntam-guntam ke beriam balat perabeni,
Leboh siang begelinggang balat tinggi,
Kaki tinggi enda alah tiki,
Ngasoh basah gari enda tejapai ka alai sangkai.

Tu ga dikumbai kami wong ke beranggong ringkat enam,
Kaki iya tambun segi batu begaam,
Pala iya padang sawa ngeraran.
Enti pagi iya bebunyi inggar dederam,
Siang iya belinggang balat beriam,
Ke benyawa guntam-guntam,
Bejulok patah tempangan putus luan,
Naban ka tengkulan tali rintai,
Ke benyawa rengai-rengai,
Nanchang di bingkai jabir ngerang.Nya alai buka kita kota tu aya,
Enggau tempenga dabong landai,
Enti kita enda tebuka ka enggau tapa jari kiba,
Nadai ko enda meh tembai kita pulai,
Awak ka kita bejalai surut undang.

Sampi Manang
Originally Written by A. Robert Ayum Mujap

Nya alai terai-terai kangau kumbai
Enggi aki kitai Manang Matai,
Enggau selanjau ijau manok tawai,
Dibai aki kitai ari Antu Buau Besai,
Nya orang mangkang tasik besai luar lelinang.

Nya ke dikena aku nyampi
Ka melanyi bujang besai,
Ke tabin birin pansa utai,
Sakit lengit enda pengerai.
lya ke gali di lenti pakan bidai,
Dibap indai iya enggau pua bali belulai,
Enggi anak ambu karong anak andai
Di kesayau ka tangkai mengandai
Enggi bujang besai ngensarai ke bungai
Sabang empang.

Nyadi diatu dibiau aku enggau selanjau
Manok tuntong engkerawai.
Nya alai penyakit enggi bujang mit laya tekesai,
Kena kebu ka bulu manok sidu tuntong belawai,
Abis tekesai lanjur nadai,
Pulai ka penyangkai pantai awai
Leletan puang.

Dini deh kami Manang Menani
Enda sidi di jari tunjok pemegai,
Ilok di tunjok kandang kerigai,
Lasit ari sumpit laja kirai.
Semengat aku tangkap iring bejalai,
Genggam enggau jari kanan bai aku pulai
Ka rumah panjai merundai.
Dia iya aku tabak ka di chiak pun gundai.
Nya alai gerai meh bujang besai
Baka telesai ujan ninggang.
Enti malam nuan tindok
Di retok papan lekai,
Dia nuan bisi mimpi mandi di ai panchor sungai,
Chelap di pusat tampong kerigai.
Dia nuan mimpi dibai orang nubai sungai,
Ngulih ka semah ikan jelawai,
Pagi sesingai manggum urai
Mau satekang.
Siang hari nuan tindok bemimpi
Gali di lenti bemban tuai.
Mimpi dibai orang ngembuah rian
Di emperan benong tembawai.
Dia nuan betiki ka buah meranti
Begulai enggau buah rembai
Mata tangkai iya lebat bekerundai
Murai bungai engkala balang.

Udah nya dibai nuan pulai
Ka penyurai rumah panjai,
Lalu disimpan indai nuan
Di salabuan tawak bebendai,
Menoh ka mandoh tajau rawai
Ke berintai tujoh terentang.
Nya alai nyangka nuan bisi mimpi jai
Begulai enggau mimpi bukai,
Nuan bebiau enggau tajau benda rawai,
Begembar enggau entukar ijau
Tuntong engkerawai.

Nya ngendas mimpi ringat
Muai utai deka datai,
Awak ka nuan pulai gerai nyamai,
Pulai ka bidai besai pakan melintang.
Gayu ko Biku, gerai ko Sempandai.
Nadai apa ko Petara,
Sama gerai, sama nyamai,
Sama gayu-guru lantang senang.

Jako Dikena Ngalu Petara Leboh Maia Gawai

Kami ke bejalai kaya-kaya niti sentali rumah reremba,
Mai terantang gendang palu Temaga,
Mai tuboh maioh bebala,
Sida ke dulu mai kayu tiang menira,
Sida ke bujang nangkin pedang bemata changka,
Lekat abu bulu kenyalang banda,
Lalu ditangkan ka belayan enggau sida ke dara,
Sida ke biak mai tabak piring jala.
Bala kami tu tau disema ka kita baka gemian ikan mirah mata,
Taja bejalai kaya-kaya nangkap di bunga ai pasang.
Agi ga kami tu tau disema ka kita,
Baka penerebai Aki Lai Kenyali Banda,
Ka ulu langgai Belaga,
Pemulai iya ari nyin ukai enda mai leka kemayau ngerang.

Nya alai kami ke lengu-lengu niti sentali rumah merundu,
Bedumbak setawak rami dipalu,
Nyan enteran menira belachu,
Lalu ditangkan ka sida ke bujang nangkin pedang parang duku,
Lalu dientudi ka sida ke biak mai tabak piring telu,
Udah nya ditangkan ka belayan kaban indu.
Keba bala kami tu tau disema ka kita baka gemian ikan iyu,
Nangkap di pupu segi gumbang.
Agi ga tau disema ka kita,
Baka penerebai Aki Lai Kenyalang Bejugu,
Ka ulu langgai Kantu,
Ukai enda pemulai iya nya mai buah lengain gemu,
Datai ditu lalu dilengka ka iya di tikai sapar rampu,
Ke tau diasoh bejako nanya jugu lang terebang.

Nya alai kami tu bisi kereja bisi pengawa,
Ngintu Taun Baru kitai Dayak,
Kami tu ga ngalu Petara nunda kereja aki kitai kalia,
Kami tu ga ngalu Sempandai sama enggau Selampeta.
Ngalu sida ke di munggu pangka ngitar,
Kena pinjar bedil temaga ke bechagak rangang-rangang,
Betampong enggau tuchong sandong gemala ke segenda tampak terang,
Sida di emperan entap nyapan,
Endor belanggar ka genteran mata changka.
Nait ka bukit lubang sawa ke lelenga ngua sentika,
Kena pansa beras kuning engkeramba digaga Keling,
Baka ke tau bepencha tukang beladang,
Sida di lembang agang tebelian,
Ambi sida ke bujang ka arang,
Dikena ngamboh pedang jadi berani.
Di munggu madang pudu,
Ambi sida lansu gelong ka lupong,
Nya pun jaban ke tebekan lalu sidi.
Nya orang ke berumah di emperan tutok tebeiian ujan nelesai,
Sida di tuchong merebong bungai,
Sida di buntut ke betiup biau balai,
Ari atas lubang panas ke bebias mandang lemai.
Nya orang ke menasan ka leban kepapa tuai,
Nya orang ke tau matan besi balan tau nempa besi mata,
Tau milai besi lantai,
Nya orang ke ngedang tuboh jungkang,
Tau matan tuboh ganggam tau mibit tuboh mit,
Tau ngembai tuboh besai,
Nya orang ke dialu di-intu kami.
Sida di Gelong Batu Nakong nyingit nyinggong nyimbang nerabang,
Ari Panggau Libau luchak lunyau,
Lendat dibiau takang isang,
Orang ari Merawa Lama munyi ke berimba bong nebang,
Nya orang ke enggau kita besarok dudok besila,
Berimbai ka kerigai rusok rinda.
Nya orang ke enggau kita besendi ka suli labong surong baya,
Sama jendam-jendam dudok di pandan tikai beara-ara,
Ari kanan Apai Renggan di-imbai Simpandai Apai Laja,
Ari kiba Pungga ari ulu Biku Bunsu Petara,
Nya meh orang ke dialu di-intu kami tu.
Tang orang ke semak agi enggau kitai begulai,
Nya petara sida ke tuai ke udah nadai,
Sida ke udah mati udah lesi,
Sida ke dulu berumpang dulu besawang,
Dulu berimba dulu muai tuga Batang Paku.
Tindin ke bebini ngambi Tida,
Demong ke bebini ngambi Rinda,
Renggi ngambi Pala,
Awan ngambi Lada.

Tang ke dudi agi enggau kitai begulai enggau bumai,
Sida Linggir sida Kadir sida Sang sida Kelanang,
Nya orang ke dialu di-intu kami ditu.
Nya alai tak ruya-ruya betebang raba,
Kami tu nanya ke berita kita ke Petara.

Ai Ansah Tukang Tusut Lebuh Betusut Maia Melah Pinang.

Nyadi aku ke bediri degi-degi
Di moa kitai sabala,
Ukai jegak enda bebasa,
Tang nyangkai ka pengawa nembu ka kereja.

Tu ga ai tempuli tanah nyadi,
Sua antu Bunsu Seregenti,
Datai ari kaki tanah rinda,
Tu ga ai terutu tanah ladu,
Sua Antu Bunsu Petara,
Tu kena sua ka Bunsu Kamba,
Datai ari lempa maram kerapa.

Tu ga ulih kami ngempong ensong,
Paung burong gaga,
Tu ga ulih nengkadah takang bintang tiga,
Ulih bechuan ka tandan bulan peranama.
Tu ai terutu ambun engkenyang jera,
Ai tangkai leka sesangga,
Endang ka chunta anak mensia,
Ngereja uma nginang dandang.

Tu datai ari tuga tunggul chenaga,
Datai ari bidang dandang uma,
Nya pemulai padi lengudai,
Ka penyurai rumah raya,
Ulih jelangoh tuboh remba,
Muka moa pedar tibang.
Kena jembi dara mereti,
Sahari-hari panas bisa,
Tu ga udah kena kunyah beruang mangah,
Ngelampin buah melanjan jera,
Kena entong dara lempong,
Di lumpong kayu chenaga.
Kena peit dara tinggi,
Di lunti buloh bala,
Kena tuchi dara nangi enggau ragi chukup bansa,
Kena pelam dara ganggam chukup malam abis maia.

Nya baru nempuah bau manah,
Datai bau nyamai ngaba bau bisa,
Kechit-kechit ai nyumpit,
Pansut ari burit benda menaga,
Kena kandang dara kumang dalam balang butol segala.
Nya baru jenti dipuji belebih bisa,
Abis mutah puang rimau garang,
Bejako kempang di moa bala.
Agi kalia menya amat ga tu dikena ngansah
Perapang pedang surong bisa,
Enggi niang Rekaya Dana,
Kena iya mapa ka China puang Batang Singkawang.

Tang ka sahari tu enda baka nya,
Tu dikena nuan nerinting puting dabong saleka,
Meda nuan bengat tak tinggi
Di lenggi labong surong baya,
Meda ngepan pekayan chukup gaya,
Meda tandang nuan ke tampak terang,
Manah simbang arong moa,
Dia lambu nuan tau bejako nusoi rita.

Nya baru aku nyua ka nuan enggau tapa jari dua,
Irup nuan kechup-kechup,
Ngambi ka begurup tama nyawa.
Tang terinting puting dabong saleka nuan aya tebah manah-manah,
Anang ngaga mit enggai ka bisi enda ninga,
Anang kalalu inggar enggai ka dikumbai orang nyada,
Tak beri pemanah iya,
Ngambi ka terang didinga orang.
Enti salah sebut nuan,
Sida teruna dara lembut ka bekerut kukut jari dua,
Enti salah tebah nuan,
Sida teruna dara bungah,
Bagas ketawa ngakah bepampul moa,
Ti ngena kami sama deka nunda ngambi ka chunta.

Tu ga kena nuan ngusai ka jala panjai,
Ngambi ka ngerembai mungkor dunya,
Kena nuan nesa penyauh sida,
Kena ngusai ka penyauh kitai,
Ka meda ka penyauh antara.
Dikena nuan ngempong daun apong,
Diara ka di moa bala mensia,
Kena tinda nuan ngara ka leka,
Besebut ka rurun tusut.

This page has the following sub pages.

• Leka Sampi Kena Nyungga Ka Anak Mit Mandi di Pendai
• Leka Sampi Gawai Dayak – 1hb June
• Leka Biau Piring
• Leka Sampi Kena Miring Ba Pendam
• Leka Jako Kena Muka Telaga
• Leka Jako Kena Manchak Babi Ba Kaki Tangga
• Leka Main – Kenyali Mupu
• Leka Jako Kena Muka Kujok Panggang
• Leka Denjang Lemambang Nenjang Sengalang Burong
• Leka Biau Melaki Bini
• Leka Jako Dikena Dalam Pengawa Melah Pinang
• Leka Biau Pengabang Leboh Melah Pinang – 2
• Leka Biau Pengabang Leboh Melah Pinang – 1
• Leka Biau Anak Mit Udah Diberi Mandi
• Leka Biau Tubai
• Leka Biau Pengaroh