Sampi Gawai Sakit

Sa…Dua…Tiga…Empat…Lima…Enam…Tuuuuujoh! 

Enda aku busong ngelanggah gunong,
Enda aku lesi ngelanggah hari,
Enda aku tumbang ngelanggah bintang,
Enda aku sulai ngelanggah tatai,
Enda aku danjan ngelanggah bulan.

Oh! Nama pemusong, nama pengelunggong aku deh?
Nama penulah, nama pengerebah aku?

Kaki aku bediri disegi besi belumpong,
Ngeli aku ngetup badi kendawan busong,
Lengan kanan aku tanggam beringan lanchum selong,
Pala landa aku udah di-bap singkap jalong jabong,
Belakang aku udah tinggang seludang baju burong.

Pechah periok tanah, diganti periok tani,
Charik labong Batik diganti labong betawi,
Padam bulan diganti matahari,
Parai orang ke tuai diganti tuboh kami.

Nya alai aku tu baka paku sulor gelong,
Baka tubu selor rebong,
Baka pendok tampong ijok,
Baka tengang tampong bulang,
Baka wi tampong tali,
Baka lemba tampong ira,
Baka rutan tampong danan.

Ukai aku mungkal,
Ukai aku nanjal,
Ukai aku muntang,
Ukai aku nengkebang,
Aku ga endang niti endang nali,
Endang tiris endang pantis,
Endang tambak endang telesak,
Endang puchok endang sumbok,
Endang nampong endang nerujong.

Ukai alah randa aku bangat deka,
Ukai alah jayak aku bangat jegak,
Aku ga nunda adat Surong Kempat ke berarat naban ka jelatong,
Aku ga nunda pantang Belang Pinggang ke senayang baruh senuyong,
Aku ga nunda penti Antu Gerasi datai ari tisi langit demuong.

Nya utai ti ditunda, utai diselada,
Nya utai dititi utai ditali,
Nya utai dichuan, diteladan aku.

O-hoi ! O-hoi ! O-hoi ! (Miau Perengka Piring)

Ni nuan munti indu ai, Ni kita senggang siti madang?
Sungai di-ulu, sungai di-ili, Bukit diturun bukit ditiki.

Ni nuan Endu dara pandai ke bejalai lumpak luak,
karong penyurai rumah panjai?

Ni nuan dara mereti pantun ati,
ke bediri tenjik-tenjik,
Karong lamba tiang medang?

Ni nuan Endu dara burok ke tindok enda bepua,
karong temetong ranggong balang?

Ni deh Achin perin dibelah karong gelegar patah,
Enda mindah kelakuyah gerah tanchang?

Ni nuan Endu Endat betumpa sendat mali lengka,
Bunsu empat paan lintang?

Ni nuan Endu Endun chelum ngelepu,
Bunsu pinta ke bedaru bandir tapang?

Ni nuan dara nganta bau nyelenga,
Bunsu tungkat dua besakang?

Ditangkan ka Jelembai dara pandai,
Bunsu tikai rinan sorang,
Lalu ditangkan ka Imbun ke bepantun mereti ati,
Bunsu baku tuang tukang.
Ni nuan Endu Dara Kelinah tampok buah pinang belubang,
Ditangkan ka Endu Dara milih sinu kasih,
Bunsu sirih betumbok tapang?
Ni nuan deh Endu Iyak bemua tambak,
Bunsu kapu kerubong kerang,
Ditangkan ka Endu Endun betuboh chelum,
Bunsu sedi lulun dituom unggun atas bedilang?

Ni nuan Dara Liut Kumang Lembut,
Bunsu lumut semakau dagang?

Ni kita ke tindok nakal singit,
kita ke bejalai ngena burit,
Bunsu chapak burak ba-ukir ilak kesulai tandang?

Ni nuan Dara Ganggam bedaai lada,
Bunsu penganan baka bulan rerak rampang?

Ni nuan Bujang mit tegar menselit,
Bunsu pulut jantau jentawang?

Nya kita ke dulu ngambi ngabang,
Dulu ngambi mansang,
Ngambi makai,
Ngambi nandai.
Angkat serta,
Angkat semua,
Ngabang abis,
Ngabang lengis.

O-hoi ! O-hoi ! O-hoi ! (Ngangau ka Tuai-Tuai Lama)

Nya baru terai-terai betenchang ratai,
Nyadoh ka tuboh ngerintai tuai.

Nya baru aku ngangkat ka kita ke lama udah timpat,
Tinggang urat sebangki api.
Tu baru aku nyungkang ka kita ke lama udah tumbang,
Tinggang batang tebelian wi.
Aku nyerungkai kita ke lama udah parai,
Keranjai indai imbok kedidi.

Ni nuan Seragindah ke tau ngaga tanah ke betingkah jadi kerapa?
Ni nuan Seragindit ke tau ngaga langit nungkat neraja?
Ni nuan Seragindam ke tau ngaga malam kakelam petang kelita?
Ni nuan Seragindi ke tau ngaga ai ke bepati enda sabaka nanga?
Ni nuan Seragindong ke tau ngaga tanjong betuntong dua?

Ni nuan Dami ke datai ari karang batu api ke menyadi rendang-rendang?
Bejulok terantang gendang nanyi,
Kena selantang bujang mereti,
Ngalu aki Lang Menari datai ari kunchi pintu hari,
Ke begamal lanji-lanji baka bunga besi bilai ditenchang?

Ni nuan Lanchap datai ari ujong tanjong lipat kena belat tiang empang,
Bejulok terantang gendang pampat,
Dua Kali renggat danggang-danggang,
Kena selantang bujang sigat ngalu ka Aki Lang Bengap,
Datai ari selikap langit entap ngelong ngeruang?

Ni nuan Chabu datai ari ujong tanjong Datu,
Tikam temuku tali tekang,
Bejulok Terantang gendang pambu,
Kena melanyi bujang tuyu ngalu ka Aki Lang Bangu,
Ke bejugu nansang ka belakang?

Ni nuan Ambau datai ari Pengkalan Tabau,
Peling lanting tawang menang bedagang,
Bejulok terantang gendang kangau,
Kena selantang bujang mipau,
Ngalu ka Aki Lang Bangau,
Baka ka pansut ari likau nabau samenang?

Nyau enda olih tesa aku tuai ke lama nadai dulu lela,
Baka ke nessa laja geran lungga juring pematang.
Nyau enda olih tiap aku tuai ke lama nadai dulu lenyap,
Baka ke niap singkap mata wang.

Tu baru aku nyerungkai kita ke dudi parai ka ulu Mandai Rawai,
Aku deka nyungkang ka kita ke dudi tumbang ka ulu Mandai Puang.

Tu aku ngangau ka Petara Gerasi Belang Pinggang,
Petara Rukok ke bejulok Apok Papong Tengkiong,
Nempuah Bau Sinang, Antu Sapuon Tebu, Pematak Bala Nyerang.

Aku ngangau ka Petara Betie “Brauh Gumbang”,
Sida Datu Patinggi Gurang,
Ngangau ka Petara Jalir, Petara Gisang,
Petara Geringu, Petara Sumbang.

Aku ngangau ka Petara Gerijih bejulok Lilih Ai Marang,
Petara Bangkam Ngaram ka Sampan Buong Rajang,
Ngangau ka Petara Uyut benama Bedilang,
Petara Atin apai Saang,
Petara Sabok Apai Mang,
Petara Rekaya Dana Bayang,
Enggau Petara Chulo bejulok Tarang.

Nya alai amat pisit utai tu tang agi ga jarang,
Amat maioh tang agi ga lapang.

Enti bumai, sapa kitai ke pandai nampai antara,
Enti nugal, sapa kitai tau nampai senggal bintang tiga?

Nadai! Ko randa kami ditu, nadai tau nengua ngambi ngabang,
Gelai kami nadai tau betandai ngambi mansang.

Uji gagai orang dipun kara nurun ke betusun betunda runti,
Orang dibarang medang berambun, ke berua apus hari.

Nya menoa dipangkang Lenguyan Tangga baan,
Sabulan bediri tenjik-tenjik,
Menoa dipangkang Bunsi mati sakejap ke bejalai jampat malik.

Nya ga berada apai nuan,
Manok banda bedada nyala ngerang kepayang,
Ke betada ringkat empat,
Ngair ditanah puting munggu,
Berada apai nuan manok sabong,
Punggong geritong tuntong rajang,
Iko beserepang betunjang buloh layu.

Kati randa nuan aki tau diasa ka kami nengua ngambi ngabang,
Kati gelai nuan aki tau diasai asoh kami betandai ngambi mansang?

Anang guai dulu,
Nganti aku nanya indai,
Amat Indai aku berita enda pandai,
Malik kita ka bilik peda kebejong bungkus pua.
Taja apai aku berita enda berani,
Tampai kita ka ruai peda kakitang antu pala.

Orang ngasoh aku ngambi ngabang,
Ngambi mansang,
Ngambi makai,
Ngambi nandai !

Oh ! nama kabuah nuan enggai deh anak!
Keba kitai ke bisi kaki kena bekenji angkat bejalai,
Keba kitai bisi sayap kena nengkebab angkat terbai,
Keba kitai bisi mata, kena ngelala meda utai,
Keba kitai bisi bulu samak enggau resu garu kirai,
Sayap bap enggau singkap pinggai pemakai,
Patok udah pasok pebentok tinchin lumbai,
Kaki da ungki enggau ragi benang cherai.

Nya baru tak enchengai munyi embuas,
Tak enchaie munyi pangkas,
Lalu ngembau munyi Ruai,
Tak ngakak munyi tajai ngair di tatai balai gambang,
Tak nidit munyi landai,
Tak nyapa munyi orang.

Ni deh Kian Dara Ganggam,
Bunsu geran tangga gerunggang,
Lalu kedemik nempap bungkong,
Nempap lamba tiang medang?
Ni nuan Endu Dara Jata Lau Moa,
Berumah di selaku randu nudong,
Karong jerua ikan ngaban dikerangan lansar nunggang?
Nya orang maioh kaban datai ari kanan, maioh aka datai ari kiba,
maioh adi datai ari ili, maioh indai datai ari sungai.

Maioh ga aku tuboh,
Satu jadi penghulu,
Maioh ga aku Kaban,
Saribu asoh aku nemu.
Sida Ari tanah asoh aku ngeluah naka punggong,
Sida Ari langit asoh aku nilik naka rekong,
Sida Ari ulu asoh aku undor sabuah buong,
Sida Ari ili asoh aku mudik sabuah barong.

Nya baru manok labang lalu terbang ngelayang rumah,
Manok tawai terebai kelah-kelah,
Inggap dimenoa orang ditinting selangking pisit baka dijir entak tiang,
Di-dan emperawan berakit baka lepi sanggol lintang.
Nya menoa dipangkang Bujang Belang Labang,
SaUgut-Ugut Tapa Kaki,
Burak pala munjong ka daie.
Keba alai bini iya Endu Tangkong Labu Genalu,
Lendu-lendu dudok antara temuai datai,
Endu Setambul Tampok Bunsu,
Ditemu bunsu Selampandai.

Nya baru taung-taung belumpong nibong,
Tasau bedau lalayang langgang kijang.
Ni deh iyang aku lemambang bunsu burong,
Berumah di tuchong Rabong Deli,
Di pangkang Bujang Runggang Sarang ke bejabong kepit lidi.

O hoi! O hoi! O hoi!

Ni deh iyang aku lemambang Sampang Gading,
Tulong aku nyadong letup asi kuning,
Ngagai tanah rapi tinting,
Ngambi ka nuan tau nyelinting milih nama.

Ni deh iyang aku lemambang Empeliau,
Tulong aku nyadong letup asi timau,
Ngagai tanah rapi pulau,
Ngambika iya nyadi aka’ Buau Nasa.

Ni deh iyang aku lemambang Bunsu Embuas,
Tulong aku nyadong piring beras,
Ngagai tanah rapi randas,
Ngambi ka nuan tau ngerepas kaban Petara.

Aku nikam ka piring penganan laboh ninggang chawan,
Aku nempalong ka piring tepong laboh ninggang sintong,
Aku ngelengka ka piring asi já laboh ninggang baka.

Terbang baru ga manok labang ngelayang rumah,
Manok tawai serimbai pagah,
Inggap dimenoa orang dikechapah dulang igal,
Karedup bandir ubir,
Munyi sida ke bujang kegeligir berengkah ngirup.
Nya menoa dipangkang Endu Senawang Nawin,
Indu dijengku ruas tulang,
Kedua bali nama Endu Senawang Nawin,
Indu di beringin gantong gendang.

Ni nuan Endu Kedemi,
Indu dititi rian nyadi ke pegari pisit lungkang,
Iyak Selinggar Matahari,
Endu Petri Rambu Benang.
Ni nuan Kelinah ke ditelah Indai Abang,
Ni nuan Endu Puyu Balu Menyagu,
Ditanak Dara biak,
Ke disium ngaba bau ngalu,
Ke nempuah sium pengabang.
Ni nuan Lulong adi Tutong,
Indu di Gelong Batu Benang.
Nya baru ngangau ka Jawai,
Ke mensengai Dayang Kumang.

Enti kita gawa ngasing gawa nguing,
Gawa ngikat gawa ngebat,
Gawa muntang gawa nengkebang,
Lengka ka dulu pengawa kita.
Abas sanggai,
Abas kumbai kami,
Abas tunggah,
Abas padah kami.

Enti pengawa,
Kami endang udah meda enggau orang ngila ngerja gawai,
Enti kerja,
Kami lama udah ngemata enggau orang nginta mela utai.

Nya baru terbai manok tawai serimbai pagah,
Lalu manggai diemperan madang bemban,
Baka ke nyan genteran sangkoh seligi,
Manggai ditanjong Batu Betangkong,
Baka bangkong lundai kemudi.
Nya ga menoa dipangkang Si Gundi Sepit Api ke bejari ragang-ragang.
Nya ga tuai orang ke nadai dulu lesi, alah di kaki Lembang Muang.
Apai Jelingau tu enda kala lenyau datai ari tuchong Panggau Libau Lendat dibiau takang isang,
Apai Datu siko ti pemadu nama mansang,
Keling Aji ke berani tau serang.

Ni nuan Ensing Gima bedada nyala ngerang kepayang,
Nya berada apai nuan Laja Aka Dara Lantan Sekumbang.
Ni nuan Linsing Kuning berani kering,
Enda kala nyelaing ka sumping dengah orang.
Enti sahari enda bayam besi,
Samina kulit ngelamun tulang,
Enti sabulan enda bayam kendawan,
Ngasoh tuboh ganggam lemunang mansang.

Ni nuan Sempurai sumba ka linga pala pengerang,
Sempurai ke tau datai ari tugau tunggol tebang.

Nya baru ngangau ka Laja siko kerindu kaban dayang,
Laja sigat serangkap panau jarang.

Ni nuan Pandak Seragatak,
Datai ari Samak Gayak Gantang,
Menoa iya ditanah sepan badak ke nempuah bau lang.

Ni nuan Tutong orang di Gelong Batu Benang,
Ni nuan Ngelai tuai orang di Meligai Pungga Pungkang.
Ni nuan Pendawan bemata tajam ke ditikam mali salah,
Nya ga apai Lua Limban,
Nyulut rangka utai diempa,
Enggai bedua enggau pangan,
Telan taban segala-gala,
Bejulok tisir jangkam,
Ka tegalan sugu mekang.

Apai Migu pan udah ga datai ditu,
Ke siru nasak kelingkang.
Apai Mama’ pan udah ga datai ditu,
Ka tuga sakai serang.

Enti kita gawa ngemata ka orang ke berani orang ke bisi ati,
Orang ke tau pulau tau kayau,
Orang ke tau serang tau pandang,
Lengka ka dulu pengawa nya,
Abas kangau,
Abas tesau,
Abas tunggah
Abas padah kami.

Ensana kami udah ngipa diseraka pampang jalai,
Kemari kami udah nganti,
Saharitu baru kita datai.
Enti iya ke kait,
Tambit enggau selabit pakan keladan,
Enti iya buta iring bejalan.

Lalu terbang baru manok labang ngelayang rumah,
Terbai manok tawai serimbai pagah,
Lalu inggap dimenoa madang pudu,
Diteku gelong ka lupong,
Ambi Lansu manang menani,
Orang dilembang pungga agang arang tebelian,
Ambi sida ke bujang kena ngamboh pedang jadi berani.

Nya menoa dipangkang Selampeta Tukol Lenda ke betempa rentang-rentang,
Menoa dipangkang Selampetoh Tukol Kamboh,
Ngamboh tuboh nyentok ka Embaloh Langgai Tawang.
Nyadi anak iya silit-ilit ngemata ka bukit tambit gerunjong,
Silik-ilik ngemata ka tasik lenang laledong.

Lapa pintu tak tekebu lalu tesilak,
Lapa dinding tak teseging lalu tekayak?
Nya ga manok labang ngambi ngabang, manok tawai ngambi nandai,
Manok pagah datai madah ka sulu’ pekirom pesan anak mensia.

Oh ! enti munyi tu,
Nama kabuah aku enda ngabang enda mansang,
Enda makai enda nandai.
Aku ga dulu nempap dara nelap ngasoh iya bisi selingap selangka dada,
Aku ga dulu nempik sida Lang Burik ngasoh iya bisi begilik leka mata,
Aku ke dulu ngerejang sida ke bujang ngasoh bisi selambang lubang nyawa.
Dini aku deka ngasoh iya merinsa,
Ngasoh iya pesina,
Ngasoh iya enda gerai,
Ngasoh iya enda nyamai,
Ngasoh iya sakit,
Ngasoh iya lengit.

Lalu terbang baru manok labang ngelayang rumah,
Terbai manok tawai serimbai pagah,
Lalu tepanggai ba bukit enggal sigi baka lengi mua benda,
Dilembang tempalong Subang,
Rendang-rendang nyandih dikarang penangkal miga.

Nya menoa dipangkang Utau ke diau tengang menoa,
Menoa Bhiku Bunsu Petara,
Pemadu nama manang mansang.
Nya orang ke ngembuan ubat serangkap genap nadai ketimpang,
Ngembuan pengaroh mua pemaioh nadai kurang,
Ngembuan puchong lua luong penampong lubang seput,Rutan sakilan sega sadepa penyukat umor idup. Lalu terbang baru manok labang ngelayang rumah,
Terbai manok tawai serimbai pagah,
Inggap dimunggu pangka ngitar kena pijar bedil Temaga,
Ke bechagak rangang-rangang,
Nait ka bukit lubang sawa,
Numbok dituchong sandong gemala kesegenda tampak terang,
Berseberai enggau batu jerua kena pansa beras kuning,
Pandang perenching jalai raya,
Dibandong engkeramba gaga Keling,
Ke bepencha landik beladang,
Ke sasipa ngaki kota.

Nya menoa dipangkang iyak tambak bunga jeranga,
Ngibun geluga dulang penyepoh,
Endu Takang Temiang Ransa,
Ngemata ka nyawa seput maioh.
Anak iya Iyak Tambak Bunga Jerami ka ba-ati sinu kasih,
Endu Tangkong Puchong Penguji ke bepurih tau ajih.

Ohoi !
Tu manok labang ngambi ngabang,
Manok tawai ngambi nandai,
Manok pagah datai madah ka jako pesan anak mensia.

Ohoi !
Sapa kita enggau aku ngabang,
Enggau aku mansang deh?
Sapa kita enggau aku makai,
Enggau aku nandai?

Aku enda endu !
Nyerumba linda’ sabong petang,
Aku ngerandang jalai bintang enggai ka selambang salah sukat.
Nyerumba lemai sabong malam,
Aku nangkin perapang pedang besuran,
Bejalai niti penturai rumah renjan,
Ngerandang jalai bulan,
Enggai ka serepan salah tiap.

Kati nuan apai enggau nandai nurun ngabang?

Aku pan enda meh endu,
Nyerumba telian ujan merabujah,
Aku gawa ngempok tanah,
Ngambi ka bisi tinggi bisi rendah,
Tang tanah bisi betingkah jadi kerapa.
Sapagi tu tadi aku ngemata ka ai,
Laban ai bisi panjai bisi pandak,
Tang ai bepati enda sebaka nanga.
Tumboh tempulor lambor radu aku ngemata ka kayu,
Bisi ga nya besai,
Bisi ga nya punggu,
Bisi mit bisi ga nya kali,
Tang samoa nyatu bela dikerindu bansa China.

Oh ! Enti bakanya kati nuan deh indai enggau aku ngabang?

Aku pen enda meh endu,
Tumboh tempulor lambor gadong,
Aku ngempok tanah nempusong,
Bejadi idong antara mata.
Nyerumba telian ujan merabujah,
Aku ngempok tanah basah,
Bejadi dilah antara nyawa.

Oh !
Enti munyi nya,
Bula nyentok nuan indai,
Munyi niang ubok menya,
Ke ngumbai diri natok tiang sandong pesok,
Retok-retok enggau tunjok jari ngengkang.
Bula nempap nuan indai,
Munyi niang Lam menya,
Ke nusoi diri nemu ikan ngaban,
Di-dan bungkong tapang.

Nama nuan tak bibula aku enda bebasa,
Tak bebangar aku diau di menoa?

Enti nyema nuan gawa gawai antu endu,
Uji tungkun ka nuan randau belom,
Tak sataun enda empa api.
Uji tanam ka nuan Jeluan,
Tak sabulan enda tumboh padi.

Niang Balang menya aku ngemata,
Nya mun iya tediri tau serang.
Tang sakali aku ngandau laun dani,
Tindok diretok papan simbang,
Nya mun iya parai digayang tuan.

Niang Minggat Apai Runai menya aku ngemata ka iya,
Nya mun iya tediri nyadi besai.
Tang sakali aku ngandau laun dani,
Tindok diretok papan lekai,
Dia kitai ninga iya parai di Panai saberai tiban Nanga San.

Enti munyi nya indai,
Sapa deh orang enggau aku ngabang,
Orang enggau aku mansang,
Orang enggai aku makai,
Orang enggau aku nandai?

Nya ibu nuan Kelinah bai nuan ngabang,
Ke bejalai ngambi tengah ke belubah nganti pangan,
Ibu nuan Lenguti bai nuan ngabang,
Ke bejalai ngambu dudi ke mali mindah jelan.
Nya ubat, Endu, Sikap genap serangkap nadai ketimpang,
Pengaroh bai maioh nadai kurang.

Lalu bejalai laju meh orang ari nya,
Ari peluru leka bangkang,
Bejalai deras sida baka upas juring pematang.

Seraya kitai ke nemuai ngagai aya nuan Peka,
Ke penempa buah raya,
Bunga iya dikemata ka anak mensia ke baru selampor uban,
Seraya kitai ke nemuai ngagai aya nuan Kedoh,
Ke tau nyilup tudoh tengah menoa,
Tau nyigau ka bunsu kemarau bulan lapan.

Tak lalu merurut meh bala Liku pari kambut langgong merajuong,
Lalu muntang bala manang ari batang terantang mengkubong.
Nya ga menoa Rimba Paka ke bemata mesai jalong,
Baka buah entimun betu’,
Nya menoa dipangkang Gerasi Tunggal gigi,
Ba-ukir dai silup entadu’,
Nya menoa dipangkang Antu bauh bulu,
Ke nyeregu baruh pegu’,
Nya orang ke bengeli lunchik dabong,
Baka beliong rapit balan,
Nya menoa orang ke bemata mesai jalong,
Mesai buah terong kangan,
Nya orang ke betingga’ nampong gerunjong,
Bepunggong ka kelutong bedil meriam.

Kena pansa sida manang nyara’ ke nengua nurun ngabang,
Kena pansa sida manang Matai ke betandai nurun memanang.

Lalu bejalai meh sida baka peluru leka bangkang,
Datai di Batang Bengang Betusu, ke pesok teling-teling,
Palan indai pipit antu ngansar ke pugu entemu laing,
Nya baru nuntong dipendai endor mandi besungga’ undang,
Manggai di lubok endor betipok jempok belakang.

Lalu bejako endu kupak kawa,
Ke sera nyawa ngeleda lupot,
Endu dara Kelinah Tampok Buah,
Keterubah mula idup.

Lalu nuan Tuanku datai ari batu tikal surat,
Raja indu kebejako tau engkeramat.

Nama kabuah aku enda lalu deh,
Tang nama kabuah kita ngumbai,
Kabuah kita nyanggai,
Nama kabuah kita nunggah,
Nama kabuah kita madah ka kami?

Kami ga mai nuan ngelabong beliong,
Meda iya nyau enda tajam.
Mai nuan nyimpan ka balan meri baja,
Ngambi ka iya gerenyam makai kukut.
Kami ga mai nuan mensiang tapang,
Meda iya nadai agi rembia,
Ngambi ka iya berebut tepan singut.
Mai nuan ngidup ka ipoh meda iya enda agi munoh,
Ngambi ka iya tau pulai bisa,
Pait dinyawa baal dimulut.
Kami ga mai nuan nanggong tuboh lempong aku,
Ngagai batu anggong,
Ngambi ka beruntong nguan menoa.
Mai nuan manggai ka tuboh besai aku,
Ngagai batu chanai,
Ngambi ka tebantai jadi Raja.
Kami ga mai nuan nyagu ka aku,
Ngagai batu pampang saribu,
Ngambi ka gayu nguan menoa.
Gayu kitai ko Sentuku,
Gerai ko Selampandai,
Nadai apa ko Petara.

Anang kita bupang kangau Lemambang,
Anang kita belebu kangau aku,
Anang kita bekabau kangau anak Bujang Lemambang Empeliau,
Angkat mengkanjong anak Bujang Kuang Kapong,
Nampok dituchong Rabong Benama.

Compiled by Gregory Nyanggau Mawar,
E-mail: gregory.mawar@shell.com